Si Papa Benedikto XVI ug ang Rosaryo
Gidapit ni Papa Benedikto XVI ang tanang mga banay pagpangadye sa rosaryo alang sa mga pahanungdan sa Santo Papa, alang sa misyon sa Simbahan ug alang sa kalinaw.Gisulti kini sa Santo Papa ngadto sa katawhan nga nagkapundok didto diin siya magpuyo panahon sa ting-init, sa Castel Gandolfo, aron pagpagadye sa Orasyon, niadtong unang adlaw sa Octubre, ang bulan nga naandan nga gipahinungod sa rosaryo ug sa misyon.
"Mao kini ang mora’g mahitabo matag tuig nga gidapit kita sa Mahal nga Inahan pagkaplag pag-usab sa kanindot niining maong pag-ampo, tuma nga yano kaayo apan tuma usab nga lawom kaayo," miingon ang Santo Papa, nga mipunting sa umaabot nga pangilin sa Birhen sa Rosaryo nga saulugon matag Octubre 7.
Ang rosaryo usa ka "kontemplatibo nga pag-ampo nga nagsud-ong sa taliwala niini kang Kristo, nga dili mabulag sa Balaang Kasulatan," mao "ang pag-ampo sa kristiyanos sa panawduaw sa pagtuo, diha sa pagsunod kang Kristo, diin nag-una si Maria," mipadayon ang Santo Papa.
Gisangpit ni Papa Benedikto XVI ang mga matuuhon "pagpangadye sa rosaryo isip banay sulod niining maong bulan," ug ang mas lapad nga banay nga espirituhanon, "mga parokya ug gagmayng simbahanong katilingban, alang sa mga pahanungdan sa Santo Papa, sa misyon sa Simbahan, ug sa kalinaw dinha sa kalibotan."
Gihatagan usab og kamahinungdanaon sa Santo Papa ang "nabantog nga apostol sa rosaryo," nga mao ang iyang gisundan sa Pagka Santo Papa, "ang pinangga nato" nga Papa Juan Pablo Dos.
Mipadayon si Papa Benedikto XVI: "Ato siyang mahinumdoman nga magluhod nga nagbitbit og rosaryohan, nga natidlom pag-ayo sa pagsud-ong kang Kristo, ingon sa iyang gihangyo usab nga atong himuon sa iyang sulat nga apostolikanhon 'Rosarium Virginis Mariae'" (ang Rosaryo sa Birhen Maria).
Sa Octubre 16, 2002, gisaulog ni Papa Juan Pablo Dos ang 24 ka tuig sa iyang Pagka Santo Papa pinaagi sa pagproklamar og Tuig sa Rosaryo ug paglusad sa maong Sulat nga Apostolikanhon ang Rosaryo sa Birhen Maria.
No comments:
Post a Comment